Tíu ár eru síðan GTA 5, einn vinsælasti leikur sögunnar og arðbærasta skemmtanaafurð heimsins, var gefinn út. GTA 6 á að koma út árið 2025, ekki á næsta ári, eins og stóð hér upprunalega. Það er pirrandi.
Karl og kona
Rockstar staðfesti loksins í febrúar í fyrra að verið væri að vinna að nýjum GTA-leik en fregnir hafa borist af því að hann eigi að gerast í Vice City, sem er GTA-útgáfa af Miami. Sú borg var síðast heimsótt í leiknum GTA: Vice City, sem kom út árið 2002.
Eins og í GTA 5 á að vera hægt að spila sem fleiri en ein persóna. Að þessu sinni er talið að hægt verði að spila sem kona og karl. Stiklan rennir stoðum undir þá kenningu en tvær aðalpersónur virðast sýndar þar, karl og kona.
Leikurinn virðist einnig gerast í uppsveitum Flórída, ef svo má að orði komast og eru krókodílar fyrirferðarmiklir í stiklunni. Þar má einnig sjá þó nokkrar persónur sem geta eingöngu verið frá Flórída.
GTA 5 kostaði Rockstar 265 milljónir dala en hefur selst í rúmlega 185 milljónum eintaka, sem gerir leikinn að næst söluhæsta leik sögunnar, á eftir leiknum Minecraft. Leikurinn hefur verið uppfærður og gefinn út á nýjar kynslóðir leikjatölva en GTA 5 kom fyrst út þegar PlayStation 3 var helsta leikjatölvan.
Það er þó fjölspilunarhluti leiksins sem hefur reynst gullgæs Rockstar Games. Í tíu ár hefur fyrirtækið halað inn peningum í gegnum þann hluta, þar sem spilurum hefur boðist að eyða raunverulegum peningum til að kaupa sér peninga í leiknum, sem eru svo notaðir til að kaupa vopn, bíla, þyrlur, föt og annað.
