Skelli­hló með kærastanum á rauðu ljósi

Asinn er mikill þessa síðustu daga fyrir jólin. Fólk á höfuðborgarsvæðinu situr fast í umferð frá því byrjar að rökkva og fram yfir kvöldmat á leið sinni hingað og þangað í innkaupum. Fólk á landsbyggðinni skellihlær á meðan að borgarbörnunum.

Það var einmitt skellihlátur í Þjóðleikhúskjallaranum á sunnudagskvöldið þar sem Kristín Þóra Haraldsdóttir leikkona tróð upp með einleik sinn Á rauðu ljósi. Kristín Þóra hefur verið mjög opin með það að hreint og beint atvinnuleysi, eftir að hafa sagt upp föstu starfi í Þjóðleikhúsinu, hafi knúið hana til að búa til verkið sem hefur svo sannarlega slegið í gegn.

Aníta Briem og Hafþór Waldorff voru á meðal gesta í salnum sem skellihlógu að frásögn Kristínar Þóru sem er með fyndnari konum landsins án nokkurs vafa. Lára Jóhanna Jónsdóttir leikkona var í góðra vinkvenna hópi og ljósmyndarinn Saga Sigurðardóttir líka. Hjónin Grímar Jónsson framleiðandi og Guðríður Lára Þrastardóttir lögfræðingur voru meðal gesta sem skemmtu sér vel.

Þorsteinn V. Einarsson hjá Karlmennskunni var mættur í Hagkaup í Smáralind í jólaösinni á mánudagskvöldið. Hann virkaði ögn þreytulegur mögulega vegna samskiptanna við frægasta starfsmann Bónus, Ester í bókhaldinu. Þarna var Þorsteinn búinn að segja sorrí við Ester og stærsta upphlaupinu í jólabókaflóðinu í ár líklega lokið.

Á sama tíma var Jóhanna Vigdís Arnardóttir, Hansa, á þeytingi í Kringlunni sem er hverfisverslunarmiðstöð Hönsu sem býr í Hlíðunum. Óttar Proppé virkaði einnig í jólagjafaleit þar sem hann steig stóru skrefin þín eftir göngunum.

Lenya Rún þingmaður Pírata var á pakkavaktinni við pakkaborðið í Smáralind á þriðjudaginn. Sannkallaður Píratapakkari!

Jón Gunnar Jónsson forstjóri Bankasýslunnar og Ingibjörg Ásta Halldórsdóttir eru eitt nýjasta par landsins og nutu á dögunum góðs austurlensks matar á Sumac á Laugaveginum.

Svo eru það þau sem eru á þönum erlendis en koma samt heim fyrir jólin. Ólafur Ragnar Grímsson fyrrverandi forseti sneri aftur frá Osló á sunnudaginn og Inga Lind Karlsdóttir fjölmiðlakona var í Gaudiborginni Barcelona. Hún er þó komin heim og búin að sækja ferskt jólatré út í skóg. Hún fagnaði nýju jólatré með piparkökum og heitu súkkulaði.

Skúli Helgason borgarfulltrúi Samfylkingarinnar sást í Everest við jólagjafakaup en til að eyðileggja ekki spennuna á heimilinu í Vesturbænum verður ekki minnst á hvaða vörur Skúli gekk út með.

Helgi Áss Grétarsson borgarfulltrúi Sjálfstæðisflokksins sást á Schiphol-flugvelli í Hollandi, á leið til landsins eftir vel heppnað skákmót. Við heimkomu tekur oft við kolsvartur veruleikinn en Helgi Áss var mættur í Bónus á þriðjudaginn að kaupa kattamat.

Út að borða á McDonald's

En svo þarf að fagna tímamótum og það gerði grafíski hönnuðurinn Rakel Guðnadóttir svo sannarlega sem varð fimmtug í gær. Rakel er gift handboltaþjálfaranum Patreki Jóhannessyni en þau eiga fjögur börn. Meðal gesta voru Björk Eiðsdóttir fjölmiðlakona, Birna Björnsdóttir dansskólastjóri og Vala Garðarsdóttir fornleifafræðingur. Veitingarnar voru af öðrum toga en í þrítugsafmæli Rakelar en þá bauð Patrekur henni út að borða á McDonald's á Spáni sem mikið grín hefur verið gert að síðan. Patrekur var á þeim tíma atvinnumaður í handbolta.

„Hann þekkti engan matsölustað,“ sagði Rakel í viðtali við Morgunblaðið fyrir tíu árum um eftirminnilegan afmælisdag tíu árum fyrr.

Vesturbæjarparið Nadine Guðrún Yaghi hjá Play og Snorri Másson ritstjóri skelltu sér með vinum sínum út að borða á Jómfrúna. Þar voru meðal annars fréttamaðurinn Oddur Þórðarson og Jakob Birgisson uppistandari sem kunna sannarlega að gera vel við sig í mat og drykk.

Auðunn Blöndal útvarpsmaður er mættur til Tenerife með fjölskylduna og mætti titla hann fyrirliða þess fjölmenna liðs Íslendinga sem mun dvelja á Spáni yfir hátíðirnar.