Sat hjá eftir að hafa stigið á boltastrák

Atvikið átti sér stað rétt áður en leikur átti að hefjast. Wembanyama keyrði að körfunni framhjá einum aðstoðarþjálfara San Antonio Spurs, kom boltanum niður með laglegu sneiðskoti og steig svo á fót boltastráks sem stóð undir körfunni. 

Myndband af atvikinu má sjá hér að neðan, birtist færslan ekki er ráð að endurhlaða síðuna. 

Gregg Popovich, þjálfari San Antonio Spurs, leit málið ekki alvarlegum augum í viðtali eftir leik. Hann sagði það varúðarráðstafanir að Wembanyama hafi ekki spilað, frekar en að hann væri of kvalinn til þess. 

San Antonio Spurs hefur ekki vegnað vel á tímabilinu og án Wembanyama áttu þeir ekki roð í Dallas Mavericks, lokaniðurstaða 119-144. Spurs sitja neðstir í vestrinu með 4 sigra og 24 töp, Dallas eru í 6. sætinu með 17 sigra og 12 töp eftir úrslit næturinnar.