Valinn sá besti í fyrstu vikunni sinni eftir langt leikbann

Hann var í gær valinn besti leikmaður vikunnar í Vesturdeildinni en Memphis Grizzlies liðið hefur unnið fjóra leiki í röð eftir endurkomu hans.

Morant hélt upp á verðlaunin með því að skora 31 stig í sigri á New Orleans Pelicans í nótt.

Hann var með 28,0 stig, 9,0 stoðsendingar og 5,7 fráköst að meðaltali í fyrstu þremur leikjum sínum sem unnust allir en hann var kosinn sá besti í vikunni fyrir frammistöðu sína í þessum þremur leikjum.

Morant skorað 34 stig og sigurkörfuna í fyrsta leiknum á móti Pelicans, var síðan með 20 stig og 8 stoðsendingar í sigri á Indiana Pacers og loks var hann með 30 stig og 11 stoðsendingar í sigri á Atlanta.

Morant var dæmdur í þetta langa leikbann eftir að hafa sést veifa byssu í Instagram myndbandi í maí aðeins tveimur mánuðum eftir að hafa hafa fengið átta leikja bann fyrir samskonar hegðun í mars.

Grizzlies var í miklu basli án síns besta manns og vann aðeins 6 af fyrstu 25 leikjum sínum.

Joel Embiid hjá Philadelphia 76ers var valinn besti leikmaður vikunnar í Austurdeildinni en hann var með 40,7 stig, 12,0 fráköst og 6,0 stoðsendingar að meðaltali í leik.