Hlýju lofti á­fram beint til landsins úr suðri

Á vef Veðurstofunnar kemur fram að það verði því suðlæg átt í dag, víða allhvass vindur eða strekkingur og súld eða rigning með köflum, en lengst af þurrt á Norður- og Austurlandi.

Útlit fyrir hvassa staðbundna sunnan vindstrengi á vesturhluta landsins í dag, til dæmis á norðanverðu Snæfellsnesi og getur verið varasamt ökutækjum sem taka á sig mikinn vind.

Hiti á landinu í dag verður yfirleitt á bilinu fimm til tíu stig, en þó getur orðið nokkuð hlýrra þar sem best lætur í hnjúkaþey.

Það er litlar breytingar að sjá til morguns, en á miðvikudag dregur úr vætu og kólnar heldur.

Veðurhorfur á landinu næstu daga

Á þriðjudag: Sunnan 10-18 m/s og rigning með köflum, en bjartviðri norðaustantil á landinu. Hiti 4 til 10 stig.

Á miðvikudag: Suðlæg átt 8-18, hvassast í vindstrengjum á vestanverðu landinu. Lítilsháttar væta, en bjart að mestu á Norður- og Austurlandi. Hiti 2 til 9 stig.

Á fimmtudag: Sunnan og suðvestan 13-18 og rigning, en lengst af þurrt um landið austanvert. Hiti breytist lítið.

Á föstudag: Vestlæg átt og stöku skúrir eða slydduél, en þurrt á Suðaustur- og Austurlandi. Kólnar í veðri.

Á laugardag og sunnudag: Vestlæg eða breytileg átt, skýjað með köflum og yfirleitt þurrt. Frost 0 til 8 stig, en frostlaust við suður- og vesturströndina.