Björg­vin Hall­dórs kveður í desem­ber

Tónleikarnir fara fram þann 21. desember í Laugardalshöll. Í tilkynningu frá Senu segir að á sviðinu verði alþjóðlegar stjörnur og landslið íslenskra listamanna. Söngvaraúrvalið ekkert minna en hreinasta dásemd líkt og síðustu ár.

„Og að sjálfsögðu, gestgjafinn sjálfur, hinn óviðjafnanlegi, töfrandi, stórbrotni og goðsagnakenndi Björgvin Halldórsson, sem kveður gestgjafahlutverkið á Jólagestum eftir þessa tónleika. Þetta verður atburður sem enginn gestur getur gleymt, jafnvel þótt hann myndi reyna!“ segir í tilkynningunni.

Meðal þeirra sem fram munu koma verða Sissel, Eivör, Svala Björgvins, Ásgeir Trausti, Helgi Björns og Gissur Páll. Auk listamanna kemur fram stórsveit, strengjasveit, karlakór, barnakór og gospelkór. Segist Sena hafa pantað aukana raforku frá norðurljósunum til að lýsa upp sviðið.Fram kemur að miðasala muni hefjast í haust. Þeir sem séu á póstlista muni fá tækifæri til að kaupa miða á undan öðrum.