Fræga fólkið streymdi á hápunkt ársins í Þjóðleikhúsinu

Svava Marín Óskarsdóttir skrifar 27. desember 2024 13:32

Forsetahjónin Halla Tómasdóttir og Björn Skúlason ásamt Magnúsi Geir Þórðarsyni Þjóðleikhússtjóra og eiginkonu hans Ingibjörgu Ösp Stefánsdóttur.

Leikritið Yerma, jólasýning Þjóðleikhússins í ár, var frumsýnt fyrir fullum sal áhorfenda í gærkvöldi, á öðrum degi jóla. Verkið er byggt á samnefndu meistaraverki Federico García Lorca frá árinu 1934 og er því lýst sem er leiftrandi, áleitnu og átakanlegu nútímaverki.

Stórskotalið leikara fer fyrir sýningunni, nánar tiltekið þau Nína Dögg Filippusdóttir, Björn Thors, Guðjón Davíð Karlsson, Ilmur Kristjánsdóttir, Ólafía Hrönn Jónsdóttir og Vala Kristín Eiríksdóttir. Leikstjórn er í höndum Gísla Arnar Garðarssonar.

Rætt var við Gísla Örn fyrir frumsýningu í fréttum Stöðvar 2 í gær.

Leikhúsgestir mættu margir hverjir í sínu fínasta pússi, þáðu freyðisvín í boði hússins áður en sýningin hófst. Fólk reis úr sætum eins og hefð er fyrir þegar forsetahjónin Halla og Björn gengu í salinn.

Óhætt er að segja að fjöldi þekktra andlita hafi verið á meðal gesta sem sumir hverjir náðust á mynd. Á meðal annarra gesta má nefna Björgólf Thor Björgólfsson og Kristínu Ólafsdóttur, Björn Ólafsson og Helgu Thors, Pál Winkel og Mörtu Maríu Jónasdóttur, Egil Ólafsson og Tinnu Gunnlaugsdóttur.

Stórleikarinn Arnar Jónsson var á svæðinu sem og Sigurður Sigurjónsson. Þar voru líka Dagur B. Eggertsson borgarstjóri, Selma Björnsdóttir leik- og söngkona, Björn Hlynur Haraldsson og Rakel Garðarsdóttir, Heiða Magnúsdóttir og Sigurbjörn Þorkelsson listaunnendur, Kristján Ingi Gunnarsson og Sigrún Briem auglýsingasérfræðingar, Unnur Ösp Stefánsdóttir leikkona og Árni Filippusson kvikmyndatökumaður svo fáeinir séu nefndir.

Gísli Marteinn, Vala, Sjón og Ásgerður á spjalli.

Tónlistin leikur lykilhlutverk í sýningunni þar sem trommarinn Gulli Briem er fyrir allra augum og stýrir tónlistinni. Sýningin hófst á háum trommuhvelli sem fékk eina konu meðal gesta til að reka upp hávært óp sem kom fólki um allan sal til að hlæja.

Edda Björg Eyjólfsdóttir og Stefán Már Magnússon.

Höfundur leikritsins, hinn heimsþekkti leikhúsmaður Simon Stone, flytur atburðarásina inn í borgarsamfélag samtímans, samkvæmt því sem kemur fram á vefsíðu Þjóðleikhússins.

Magnús Geir Þjóðleikhússtjóri, Ingibjörg Ösp Stefánsdóttir, Gísli Örn Garðarsson og María Sigrún Hilmarsdóttir.

Fjöldi þjóðþekktra einstaklinga mættu á forsýninguna í sannkallaðri jólastemmningu. Má þar nefna Forsetjahjónin Höllu Tómasdóttur og Björn Skúlason, Gísla Martein Baldursson, Unni Ösp Stefánsdóttir, Elínu Sif Hall og Felix Bergsson svo fáir einir séu nefndir.