Rigningarveður í kortunum

„Í dag gengur í austan og norðaustan 10-18 m/s (strekkingur eða allhvass) með rigningu víða um land, en slydda eða snjókoma í innsveitum og á heiðum á norðurhelmingi landsins. Talsverð rigning á Suðausturlandi og Austfjörðum, enda eru þeir landshlutar mest útsettir fyrir úrkomu þegar lægð nálgast landið með þeim hætti sem við búumst við í dag. Hiti 1 til 8 stig, mildast syðst,“ segir í textaspá Veðurstofunnar.

Þar segir að í kvöld verði lægðarmiðjan komin upp að suðausturströndinni og þá muni lægja sunnan- og austanlands og draga úr úrkomumagni.

„Á morgun heldur lægðin áfram til norðurs, spár gera ráð fyrir að miðja hennar verði austur af Langanesi um hádegisbil. Það þýðir að morgundagurinn verður norðanáttardagur, ýmist kaldi eða strekkingur. Búast má við slyddu eða snjókomu með köflum á norðanverðu landinu, en lítil eða engin úrkoma sunnanlands. Það kólnar smám saman með norðanáttinni og væntanlega komið frost um mestallt land annað kvöld.“

Veðurhorfur á landinu næstu daga:

Á mánudag:

Norðan og norðvestan 8-15 m/s. Snjókoma eða slydda með köflum á norðanverðu landinu, en yfirleitt þurrt sunnanlands. Kólnandi veður, allvíða vægt frost um kvöldið.

Á þriðjudag:

Breytileg átt 3-8 og dálítil él í flestum landshlutum. Frost víða 0 til 4 stig.

Á miðvikudag og fimmtudag:

Suðvestlæg átt og él, en yfirleitt þurrt og bjart norðaustantil á landinu. Frost 0 til 7 stig, kaldast norðaustanlands.

Á föstudag:

Hvöss suðaustanátt með rigningu eða slyddu og hlýnandi veðri.

Á laugardag:

Stíf sunnanátt og úrkomusamt, einkum á sunnanverðu landinu.