50+: Að eiga draumalista getur komið okkur skemmti­lega á ó­vart

En hvers vegna ætli það sé?

Jú; það er svo margt sem gerist eftir fimmtugt. Hlutverkin okkar eru oft að breytast og það hvað okkur fannst mikilvægt áður og svo framvegis. Auðveldast er að nefna dæmi um að krakkarnir séu orðnir stálpaðir og að kappsemin felst ekki lengur í að byggja upp heimili. Margir horfa öðruvísi til starfsframans en áður og upplifa vinnuna ekki eins ofarlega á forgangslistanum og svo framvegis. 

Sumir hafa þó þá skringilegu tilfinningu að þeim langi í eitthvað „meira“ í lífið, en vita ekki alveg hvað. Gott fyrsta skref til að kryfja þessa tilfinningu betur er að setjast niður með kaffibolla, eða jafnvel einu vínglasi að kvöldi, og skrifa niður lýsingar á a) Einum degi eins og þér fyndist hann frábær og 2) Einni viku eins og þér fyndist hún frábær. Því oft áttum við okkur betur á því hvað okkur langar að gera þegar við búum til svona einfalda lista eða lýsingar eins og þessar.

En aftur að draumalistanum. Það sem gerir draumalistann svo góðan fyrir fólk sem er smátt og smátt að skipta um takt eftir áratuga hlutverkaskipan í uppeldi og uppbyggingu heimilis og starfsframa eru margvísleg jákvæð áhrif. Hér eru nokkur jákvæð atriði:

1. Draumalistinn hjálpar okkur að setja drauma okkar g langanir niður á blað. Það sem við þurfum samt að passa okkur á er að þegar við skrifum niður atriði á draumalistann þá eigum við ekki að hugsa hluti eins og „já, ef þetta gerist, þá get ég mögulega gert þetta….“ Heldur einfaldlega að skrifa niður það sem okkur langar að gera; óháð því hvernig eða hvort. Því draumalistinn er draumalisti!
2. Þegar við erum búin að búa til draumalista, getum við farið að setja okkur markmið. Veljum kannski eitt eða tvö atriði af draumalistanum sem við ætlum að setja í forgang og förum að vinna í því: Hvenær og hvernig og svo framvegis. Gott er að setja tímalínu á markmiðin okkar og hér er um að gera að ræða hlutina við okkar nánasta fólk; Maka eða vini.
3. Að eiga draumalista er mikið pepp. Og meira segja sagt að hjálpi stundum við að yfirstíga efasemdir eða kvíða um að geta ekki þetta eða hitt. Því draumalistinn eykur líkurnar á að okkur takist að uppfylla drauma okkar og vá hvað það er góð tilfinning að átta okkur betur á því hversu megnug við erum og líkleg til að geta gert svo margt! 
4. Draumalisti getur gert okkur orkumeiri og jafnvel ánægðari. Því við verðum svo uppfull af áhuga, ástríðu og tilhlökkun; Svo margt i gangi hjá okkur að okkur finnst, þótt við séum bara að undirbúa það sem við ætlum að gera fyrst á listanum.
5. Enn ein jákvæðu áhrifin er hvernig við mögulega komum okkur sjálfum aðeins út fyrir þægindarammann; Förum að átta okkur betur á því hvað okkur langar til að gera, hvað okkur finnst skemmtilegt að gera og svo framvegis.
6. Síðast en ekki síst getur draumalistinn einfaldlega komið okkur sjálfum á óvart; Allt í einu erum við farin að breyta um einhverja stefnu til framtíðar, hugsa lengra fram í framtíðina, sjáum fyrir okkur ævintýralegra líf en áður, einhverjar breytingar sem við höfðum ekki hugsað fyrir áður og svo framvegis. 

Því já; Draumalistinn hjálpar okkur ekki aðeins að vera virk í að dreyma og hugsa stórt, heldur hjálpar okkur líka að komast að því hverjir draumarnir okkar eru eftir allt saman: Og hversu spennandi er það nú?!