Bjart með köflum en blæs úr austri í kvöld

Á vef Veðurstofunnar segir að hiti verði á bilinu sex til fjórtán stig og hlýjast á Vesturlandi.

Í kvöld fer svo að blása úr austri með suðurströndinni. Það mun halda áfram til morguns og verður þá strekkingur eða jafnvel allhvass vindur á þeim slóðum. Annars staðar á landinu austan gola eða kaldi.

„Það þykknar upp sunnanlands seinnipartinn með köflóttri rigningu og einnig rigning á Austfjörðum um kvöldið. Morgundagurinn verður hins vegar bjartur norðan- og vestantil á landinu og hiti kringum 15 stig þegar best lætur, sá hiti verður kærkominn fyrir norðan, en þar hefur verið mjög kalt síðastliðna viku,“ segir á vef Veðurstofunnar.

Veðurhorfur á landinu næstu daga

Á miðvikudag: Gengur í austan 5-10 m/s, en 10-15 við suðurströndina. Víða þurrt og bjart veður, en fer að rigna sunnanlands seinnipartinn og einnig á Austfjörðum um kvöldið. Hiti 7 til 15 stig, hlýjast á Norður- og Vesturlandi.

Á fimmtudag: Norðvestlæg eða breytileg átt 3-10. Skýjað að mestu og dálítil væta með köflum, en yfirleitt þurrt um kvöldið. Hiti 7 til 17 stig, svalast norðvestantil.

Á föstudag: Norðaustan 3-8 og bjartviðri, en skýjað á austurhelmingi landsins og þurrt að kalla. Hiti frá 7 stigum við austurströndina, upp í 18 stig á Suðvesturlandi.

Á laugardag, sunnudag og mánudag: Útlit fyrir austan- og norðaustanátt. Skýjað að mestu og væta með köflum í flestum landshlutum. Hiti 8 til 16 stig.