Væta víðast hvar og hiti að sau­tján stigum

Frá þessu segir í hugleiðingum veðurfræðings á vef Veðurstofunnar. Þar kemur fram að seinnipartinn verði lægðin fyrir norðan land og beini þá til okkar vestan- og norðvestanátt, víða golu eða kalda.

Yfirleitt verður úrkomulítið og sunnan- og austanlands ætti að birta til.

„Norðaustlæg eða breytileg átt á morgun, 3-10 m/s og milt og bjart veður á stórum hluta landsins, en hiti verður víða á bilinu 11 til 18 stig. Austantil á landinu verða hins vegar einhver lágský viðloðandi fyrri part dags og þar nær hitinn sér líklega ekki á strik í hafáttinni.

Áfram milt og bjart á Norður- og Vesturlandi á laugardag, en mun svalara og einhver væta austanlands,“ segir á vef Veðurstofunnar.

Veðurhorfur á landinu næstu daga

Á föstudag: Norðaustlæg eða breytileg átt 3-10 m/s og víða bjartviðri, en skýjað með köflum á austanverðu landinu fram eftir degi. Hiti frá 7 stigum við norðausturströndina, upp í 18 stig suðvestanlands.

Á laugardag: Norðaustlæg eða breytileg átt 3-10. Súld eða dálítil rigning suðaustan- og austantil og hiti 5 til 11 stig, en þurrt og bjart á Norður- og Vesturlandi með hita að 17 stigum.

Á sunnudag: Hæg breytileg átt, skýjað með köflum og dálítil væta á víð og dreif. Allvíða þokuloft við ströndina. Hiti 7 til 15 stig, mildast inn til landsins.

Á mánudag og þriðjudag (lýðveldisdagurinn): Breytileg átt og rigning eða súld með köflum. Hiti 7 til 14 stig.