Fyrsta fjölbragðaglímufélag landsins stefnir á sýningu

Í spilaranum hér fyrir neðan má sjá hvernig æfingar fara fram hjá fyrsta fjölbragðaglímufélagi Íslands, Icelandic Combar Theatre. Það var stofnað í upphafi árs og er starfrækt í bílskúr stofnanda félagsins.  

Eini hringur sinnar tegundar á Íslandi

„Ég fékk þennan hring í gegnum Wrestling rings uk. Þeir eru þarna í Englandi og ég sendi þeim tölvupóst. þeir semsagt bjuggu hann til eftir þeim málum sem ég bað þá um að gera,“ sagði Viktor Sigursveinsson, einn stofnenda félagsins um hringinn sem er sérsmíðaður og var fluttur í pörtum í gám til landsins.

Er þetta eini svona hringurinn sem þú veist um á Íslandi? 

„Ég get bókað það að þetta er sá einni.“

Fimm félagsmenn skipa nú félagið en það eru þeir: Vikt­or Sig­ur­sveins­son, Óskar Dag­ur Marteins­son, Rán­ar Þor­steins­son, Páll Sig­urður Sig­urðsson og Rós­ant Bósi Rós­ants­son.

 Drengirnir binda vonir við að geta stækkað aðstöðuna í framtíðinni þannig að það sé hægt að taka á móti fleiri iðkendum.

Getur verið bæði hryllingur og grín

Félagsmenn æfa tvisvar í viku og stefna á halda fyrstu fjölbragðaglímusýninguna í lok sumars. Áhugamálið sé minna feimnismál en áður.

„Mér finnst Ísland vera opnara fyrir svona hlutum núna,“ sagði Viktor.

Svo fólk er spennt fyrir þessu? 

„Já svo sannarlega, eins og vera ber,“ bætir Viktor við kíminn.

En hvað er fjölbragðaglíma?

„Þetta er allt og ekkert. Það er erfitt að setja fjölbragðaglímu í box. Þetta er bæði stunt show og drama. Þetta getur verið hryllingur og þetta getur verið grín. Þetta er í sinni eigin deild,“ svarar Viktor.

„Þetta er svona íþrótta stunt sápuópera,“ bætir Óskar Dag­ur Marteins­son, einn stofnenda við.

Vonast til að skilja eftir sig arfleið

Stofnendur segja báðir um langþráður draum úr æsku að ræða sem sé nú að rætast.

„Það fór illa í mig þegar ég var yngri að þetta væri ekki í boði á Íslandi. Að verða rosa frægur af þessu, ég hef engan áhuga á því. Eða verða moldríkur af þessu, ég hef engan áhuga á því. Ég vill bara að það sé komið nýtt listrænt form til Íslands. Vonandi þá þegar ég hætti í þessu þá heldur þetta áfram hjá fólki sem er kannski ekki búið að fæðast enn þá.“

Þó að það sé hægt að tala og tala um fjölbragðaglímu þá er bara ein leið til að skilja hana fullkomlega og tók því fréttamaður þátt og fékk stofnanda fjölbragðaglímufélagsins á Íslandi til að lúskra aðeins á sér að hætti hússins. Það má berja augum í spilaranum hér að ofan.