Veðurspáin er ansi blaut fyrir mestu ferðahelgi ársins, verslunarmannahelgina, þar sem fólk er á flakki landshluta á milli.

Vindhraði gæti náð allt að 22 metrum á sekúndu á laugardagsmorgun í Vestmannaeyjum, samkvæmt spá Veðurstofu Íslands.

Siggi Stormur spáði roki og rigningu um allt land á laugardag og segir óvitlaust að gera pollagalla að inngönguskilyrði inn í Herjólfsdal. Einar Sveinbjörnsson spáir því reyndar að það rætist örlítið úr rigningunni.

En hvað segja spámenn?

Sigga kling spáir plokkfisk

Sigga Kling, ein ástsælasta spákona landsins, segir við fréttastofu að eldgosið sem hófst á Reykjanesskaga í mánuðinum hafi verið forboði þess leiðindaveðurs um helgina. „Eldgosið er að gera þetta vesen,“ segir hún.

„Það verður hlýtt og það verða allir í stuði en það má búast við að það sé raki víðs vegar,“ segir Sigga. „En það kemur pínu sól.“

Í raun megi búast við sitt lítið af hverju.

„Þetta verður eins og góður plokkfiskur, með bernaise og lauk og öllu,“ segir hún, „bara samansafn af verði.“ 

Gott veður fáist þó aðeins ef Íslendingar biðji hin andlegu öfl fallega.

Valgerður Bachmann býst við besta veðrinu fyrir norðan

Valgerður Bachmann, skyggn sem kveðst hafa starfað í andlegum málefnum í rúman áratug, segir við fréttastofu að það verði sól í eyjum en engin útlandastemning.

„Það verður sól en ekki svo mikil sól að við fáum einhvern Tenerife-fíling,“ segir hún. „Það sést í sól.“

Samkvæmt hennar spá verða Íslendingar þó ekki lausir við vætu þessa helgina. Annars staðar á landinu býst hún við rigningu en besta veðrinu fyrir norðan.

„Það verður léttara veður á Akureyri,“ kemst hún að orði.

Hún spáir þó hörkustemningu víða á landinu. „Íslendingar hafa aldrei látið veðrið stoppa sig,“ segir Valgerður.

Ellý Ármanns spáir sólarvörn

Spár Ellýjar Ármannsdóttur hafa farið sem eldur um sinu netheima síðustu vikur. 

Með hjálp pinnanna sinna spáði hún því fyrir mánuði að nauðsynlegt yrði að bera á sig sólarvörn á Þjóðhátíð í Eyjum um helgina. Fyrr hafði hún — eða pinnarnir — spáð góðu veðri.

Fréttastofa hefur reynt að ná tali af Ellýju í dag til að athuga hvort hún hafi uppfært spá sína en hún hefur ekki svarað símtölum blaðamanns.

Stjörnufræðingurinn yrkir

Þá leitaði blaðamaður til stjörnufræðingsins Gunnlaugs Guðmundssonar sem hefur áratugum saman gert stjörnukort fyrir fólk.

Hann hafði ekki mikið um veðrið að segja en hafði þó ort ljóð um veðrið í sumar sem hann deildi með blaðamanni. Það hljóðar svo:

Tenerife, eyja fyrir sunnan, í sól, heit og þægileg 

Ísland, eyja fyrir norðan, í rigningu, köld og kraftmikil 

Burtséð frá veðrinu telur Gunnlaugur að Íslendingar komi til með að skemmta sér þó að það rigni.

Og að sama skapi, burtséð frá áliti spámanna, mælir fréttastofa með því að lesa vandlega yfir veðurspár Veðurstofu Íslands eða annarra sérfræðinga áður en haldið er út á land.