„Skýið er bleikt og við erum sannar­lega enn þá á því skýi og í sjokki“

Um er að ræða sýninguna á Ormstungu sem hefur fengið frábærar móttökur síðan hún var frumsýnd enda hreyfir þessi nýjasta útgáfa Íslendingasagnanna frá 14. öld við ungum sem öldnum. Í þessari uppsetningu takast þeir Gunnlaugur Ormstunga og Hrafn Önundarson ekki aðeins á í kveðskap heldur er rappað og sungið fyrir allan peninginn. Í Íslandi í dag var rætt við höfundana tvo.

„Skýið er bleikt og við erum  sannarlega enn þá á því skýi og í sjokki. Við erum í spennufalli. Að vísu gerðum við þetta auðvitað sem skólasýningu í LHÍ og þá var svona fyrsta frumraunin kannski að sjá þetta á svið en þá var þetta umgjörðarlaust. Þá voru allir bara í svörtu, tveir kórpallar og engir búningar. Og að sjá þetta svo með þessari umgjörð, þessari frábæru leikmynd, bandinu og búningunum, það er svona auka spennufall ofan á upprunalega spennufallið,“ segir Hafsteinn Níelsson, höfundur Ormsstungu en her að neðan ma sja innslagið í heild sinni.

Gísli Örn vildi sjá þeirra sýn

„Fyrst um sinn ætluðum við að byrja að skrifa en svo fengum við okkur kannski einum of marga og vorum ekkert að þessu svona svo almennilega fyrr en við vorum að kryfja svona persónurnar og söguna upp úr bókinni,“ segir Ólíver Þorsteinsson höfundur verksins.

Um var að ræða algjöra draumaframvindu fyrir unga og upprennandi listamenn. Að þeirra mati voru það algjör forréttindi að fá að fylgjast með verkinu stækka og taka breytingum í meðferð Gísla Arnars leikstjóra.

„Í rauninni þurftum við aldrei þannig lagað séð að sleppa takinu, út af því að Gísli var mjög svona ákveðinn í því að við ættum bara að vera með í öllu ferlinu og við fengum svona að fylgja þessu eftir,“ segir Ólíver.

„Við byrjum bara og mætum á fyrsta samlestur og mætum á æfingar uppi í Málarasal og fylgjumst með æfingunum hérna á sviðinu. Og Gísli var líka ekki feiminn við að bara segja við okkur að ef við værum með einhverja punkta, þá bara að koma með þá, af því að hann sagði við okkur að hann vildi bara lyfta upp okkar sýn og okkar verki,“ segir Hafsteinn.