Sigrún: Það var mjög mikið sem gekk upp í dag

Hvað var Ísland að gera rétt að mati Sigrúnar?

„Við spiluðum bara mjög vel saman. Við mættum fysikal leiknum þeirra og spiluðum mjög vel. Frábær vörn og við stigum vel út. Það var mjög mikið sem gekk upp í dag.“

Sigrún var eins og áður segir frábær í kvöld og sérstaklega varnarlega en hún stal fimm boltum, tók fimm fráköst og skoraði fimm stig. Hvað var skipunin sem Pekki Salminen þjálfari lagði upp fyrir hana í kvöld?

„Bara setja eins mikla pressu á boltann og ég get og þannig reyna að hjálpa liðinu mínu“, sagði Sigrún og þurfti ekkert að flækja málin. Mjög oft sem Sigrún kom í veg fyrir að leikstjórnandi Portúgal næði að komast sína leið sem gerði sóknarleik þeirra mjög erfiðan.

Íslenska kvennalandsliðið er í mótun að manni finnst. Getur Sigrún tekið undir það að eftir því sem leikjunum fjölgar þá verður liðið betra?

„Já eins og við sáum á móti Serbíu í fyrri hálfleik og núna í 40 mínútur þá náum við betur og betur saman. Því meira sem við spilum því betra verður þetta.“ 

Ísland hefur oft átt erfitt að halda út í 40 mínútur í leikjum. Hvað var öðruvísi til dæmis frá Serbíu leiknum?

„Við vorum bara ákveðnar að mæta út í þriðja leikhlutann. Við höfum verið að byrja vel en ekki náð að halda út þannig að við þurftum að vera ákveðnar í 40 mínútur og við náðum því í dag.“

Sigrún hló við þegar hún var spurð út í hvað framtíðin bæri í skauti sér.

„Það bara kemur í ljós. Ég veit það ekki.“