Þre­föld tvenna Jokic heldur Denver á lífi

Um var að ræða fimmta leik liðanna tveggja en Minnesota leiddi 3-1 fyrir leik næturinnar sem fram fór á heimavelli Nuggets í Colorado. Serbinn Jokic skoraði 27 stig, tók tólf fráköst og gaf 16 stoðsendingar í sigrinum sem gerir að verkum að staðan er orðin 3-2 og einvígið lifir.

Orlando Magic heldur áfram að koma á óvart gegn Detroit Pistons. Síðarnefnda liðið kom inn í úrslitakeppnina sem efsta lið Austurdeildarinnar en galdramennirnir frá Orlando leiða einvígið 3-1 eftir 94-88 sigur í Flórída í nótt.

Magic hefur ekki komist lengra en í fyrstu umferð úrslitakeppninnar síðan 2010, hefur átta sinnum fallið úr í fyrstu umferð og níu sinnum mistekist að komast í úrslitakeppnina yfirhöfuð. 

Shai Gilgeous-Alexander fór þá að venju fyrir Oklahoma City Thunder, toppliði Vesturdeildarinnar, sem sópaði Phoenix Suns 4-0 þökk sé 131-122 sigri í Arizona í nótt. Gilgeous-Alexander skoraði 31 stig í sigri næturinnar og ljóst að Thunder mætir annað hvort Los Angeles Lakers eða Houston Rockets næst.

Lakers leiðir seríu þeirra liða 3-1.