Guardiola: „Ég er fyndinn gaur“

Antoine Semenyo skoraði eina mark bikarúrslitaleiksins á Wembley á 72. mínútu. Hann stýrði þá boltanum í netið með hælnum eftir sendingu frá Erling Haaland.

Þetta er í þriðja sinn sem Guardiola stýrir City til sigurs í ensku bikarkeppninni. Undir hans stjórn hefur City einnig unnið ensku úrvalsdeildina sex sinnum, deildabikarinn fimm sinnum og Meistaradeild Evrópu einu sinni.

Miklar vangaveltur hafa verið um framtíð Guardiolas hjá City; hvort hann haldi áfram með liðið sem hann hefur stýrt frá 2016.

„Augnablikið sem eldurinn dofnar förum við heim. Ég er fyndinn gaur,“ sagði Guardiola eftir úrslitaleikinn í dag.

„Ég hef verið mjög góður á þessu ári. Síðasta tímabil var það erfiðasta af ýmsum ástæðum. Þetta tímabil snýst um hvernig við högum okkur á hverjum degi. Það tók okkur kannski tíma að finna stöðugleika. Enska úrvalsdeildin bíður ekki eftir þér.“

Nýkrýndu bikarmeistararnir fá ekki langa hvíld því á þriðjudaginn sækir City Bournemouth heim í næstsíðustu umferð ensku úrvalsdeildarinnar.

City er tveimur stigum á eftir toppliði Arsenal sem mætir nýliðum Burnley á mánudaginn. City þarf að treysta á að Arsenal misstígi sig í síðustu tveimur umferðunum til að verða Englandsmeistari í sjöunda sinn síðan Guardiola tók við liðinu.