Vilja ekki sjá annað lið fagna titlinum í Síkinu, aftur

Valur Páll Eiríksson skrifar 18. maí 2026 12:30

Pétur Rúnar Birgisson, fyrirliði Tindastóls, segir Stólana ákveðna í að endurupplifa ekki það sem gerðist í Síkinu fyrir nánast sléttu ári síðan. Vísir/Hulda Margrét

Pétur Rúnar Birgisson, leikmaður Tindastóls, segist spenntur fyrir leik fjögur í úrslitaeinvígi hans manna við Grindavík um Íslandsmeistaratitil karla í körfubolta. Leikurinn fer fram í Síkinu í kvöld og Grindavík vinnur titilinn með sigri.

„Stemningin er góð. Það er tilhlökkun í mannskapnum að spila aftur. Það er gaman að spila þétt og ég held að menn séu spenntir að halda áfram,“ segir Pétur í samtali við Vísi.

Andinn hafi eðlilega aukist í samfélaginu á Sauðárkróki með sigri Tindastóls í Grindavík á föstudagskvöldið var, enda einvígið þar af leiðandi á lífi.

„Þetta er alltaf bara geggjað. Það eru allir með okkur í liði og spenntir fyrir þessu. Það er ekkert verra að það er komið ágætis veður hérna, sólin skín. Það verður væntanlega fjör í tjaldinu fyrir leik og vonandi taka þau það með sér inn í Síkið. Það er verður stemning og gaman,“ segir Pétur.

Hvað gerðu Stólarnir rétt í þessum þriðja leik á föstudaginn eftir töpin í fyrstu tveimur leikjum einvígisins?

„Leikur tvö og þrjú voru ekkert svo frábrugðnir. Við vorum góðir í leik tvö en hittum svolítið illa. Það eru alltaf einhverjar smá tilfærslur milli leikja hjá báðum liðum og það breytist ekkert. Það verða einhverjar breytingar milli leikja þrjú og fjögur,“

„Varnarlega náðum við að gera vel að vera í línum svo þeir komust ekki á körfuna og þurftu meira að skjóta fyrir utan. Við vorum að gera betur á aukaleikarana að gefa þeim ekki galopin skot, að þurfa að hugsa sig aðeins meira um,“ segir Pétur.

„En það er bara nýr leikur í kvöld sem á sitt líf og við þurfum að mæta tilbúnir í hann.“

Stjarnan fagnaði Íslandsmeistaratitlinum á Sauðárkróki í fyrra eftir sigur á Tindastóli í oddaleik um Íslandsmeistaratitilinn. Grindavík getur tryggt sér titilinn í kvöld og Pétur segir heimamenn ákveðna í að þurfa ekki að upplifa titilfögnuð andstæðings í Síkinu annað árið í röð.

„Já, klárlega. Það er planið að lenda ekki í því aftur. Við þurfum bara að mæta klárir og tökum eiginlega ekkert annað með okkur en sigurinn úr síðasta leik. Svo þurfum við að mæta tilbúnir og gera eins vel ef ekki betur og sjá til þess að það verði ekki fagnað í kvöld,“ segir Pétur.

Leikur Tindastóls og Grindavíkur er klukkan 19:15 í kvöld. Upphitun hefst á Sýn Sport Ísland klukkan 18:30.

Bónus-deild karla Tindastóll Grindavík

Mest lesið

Fleiri fréttir