Baldur tekur við Álftnesingum

Baldur Þór Ragnarsson er nefnilega nýr þjálfari Álftaness en hann er nýhættur störfum hjá nágrannaliði Stjörnunnar.

Baldur tekur við starfinu af Hjalta Þór Vilhjálmssyni. Hjalti stýrði liðinu eftir áramót er Kjartan Atli Kjartansson sagði starfi sínu lausu.

Hér að neðan má sjá fréttatilkynningu Álftnesinga:

Stjórn Álftaness hefur gengið frá ráðningu Baldurs Þórs Ragnarssonar sem næsta þjálfara Álftaness.

Baldur býr yfir mikilli reynslu en hann hefur þjálfað Þór Þorlákshöfn, Tindastól og nú síðast Stjörnuna hérlendis ásamt Orange Academy Ulm í Þýskalandi.

Þá hefur hann náð góðum árangri með Þór og Tindastól en hann var valinn þjálfari ársins árið 2022 eftir mjög eftirminnilegt tímabil með síðarnefnda liðinu.

Í kjölfarið fór hann á meginlandið og var þar í tvö ár áður en hann fór svo til Stjörnunnar. Hann gerði þar Stjörnuna að Íslandsmeisturum eftir frægt úrslitaeinvígi við Tindastól. Baldur hefur einnig, eins og flestir vita, getið af sér gott orð sem aðstoðarþjálfari íslenska landsliðsins.

„Það er mikill happafengur að fá Baldur til liðs við okkur á Álftanesið. Allir körfubotlaunnednur þekkja hvernig hann hefur náð árangri og hverslags reynslu hann býr yfir. Ráðning hans er mikill styrkur fyrir klúbinn og styður við þá vegferð sem klúbburinn er á,“ segir Huginn Freyr Þorsteinsson, formaður körfuknattleiksdeildar Álftaness.

„Ég er mjög spenntur fyrir því að taka við liðinu. Það er spennandi verkefni framundan að byggja ofan á það flotta starf sem hér hefur verið unnið og ég hlakka mikið til að hefja samstarfið við leikmennina og fólkið í kringum klúbbinn,“ segir Baldur Þór Ragnarsson, þjálfari Álftaness.