Vildu leggja stór deilu­efni til hliðar til að skapa starfs­frið

Samninganefndir Icelandair og Félags íslenskra flugmanna funduðu síðast hjá ríkissáttasemjara á föstudag. Viðræður eru sagðar þungar og þokast lítið áfram. Enginn fundur hefur verið boðaður í vikunni.

Samkvæmt heimildum fréttastofu hefur samninganefnd Félags íslenskra flugmanna lagt fram tilboð um skammtímasamning sem er ætlað að skapa starfsfrið yfir sumarvertíð Icelandair. Með skammtímasamningunum yrðu stór deiluefni sem styr hefur staðið um lögð til hliðar og sett skýr verkáætlun um þau á samningstímanum.

Ástráður Haraldsson ríkissáttasemjari segir slíkar hugmyndir hafa verið reifaðar við samningsborðið en þær hafi ekki náð flugi.

Stóru málin sem styr hefur staðið um varða fyrirætlanir Icelandair um kaup á 49% hlut í félaginu Play Europe sem er með flugrekstrarleyfi á Möltu. Þar stendur deilan á því hversu stór hluti af rekstri Icelandair fer þar undir og hvort notast verði við stéttarfélagsbundna flugmenn.

Annað stórt atriði sem deilt er um er vinnuframlag flugmanna sem jókst um 22% við undirritun kjarasamninga árið 2020 og var liður í endurreisn félagsins. Nýting fór úr 525 flugtímum á ári í 640 flugtíma á ári en flugmenn vilja meina að sú nýting hafi aukist á samningstímanum.

Þá er einnig deilt um að Icelandair fái auknar heimildir til að stunda svokallaða blautleigu, þar sem félagið myndi leigja flugvél ásamt áhöfn af öðru flugfélagi til að sinna áætlunarflugi fyrir Icelandair. Heimild er til þess innan kjarasamninga í undantekningartilvikum í dag.

Kjaradeilan er því sem stendur á erfiðum stað og hefur tekið sinn toll á flugáætlun Icelandair frá því henni var vísað til sáttasemjara. Icelandair hefur aflýst tuttugu áætlunarferðum síðasta mánuðinn vegna mönnunarvanda.

Þrátt fyrir aflýsingarnar komust um 98 prósent ferða Icelandair á áfangastað í maí samanborið við 99 prósent í maí fyrra. Stundvísi félagsins var um 80 prósent í mánuðinum, samanborið við 84 prósent á sama tíma í fyrra.

Icelandair hefur sagt það stafa af samstilltum aðgerðum flugmanna sem neiti að selja frídaga sem gert sé ráð fyrir innan kjarasamninga. Það hafi ekki gerst síðan 2014 þegar flugmenn og Icelandair deildu um kaup og kjör. Flugmenn hafna því og segja ábyrgðina liggja hjá Icelandair. Félagið hafi lagt upp með flugáætlun sem stæði og félli með því að hægt væri að kaupa frídaga af flugmönnum.