Halla T og Björk í stuði á Lista­há­tíð

Hátíðin var sett á laugardag í 35. sinn við hátíðlega athöfn í Listasafni Reykjavíkur, Hafnarhúsi. Gestir fjölmenntu á opnunarhátíðina þar sem boðið var upp á tónlist, dans, myndlist og fjölbreytta dagskrárliði sem gáfu innsýn í það sem fram undan er á hátíðinni. Dagurinn einkenndist af gleði, eftirvæntingu og lifandi menningarlífi víðs vegar um miðborgina.

Hátíðin stendur til 14. júní næstkomandi en að henni koma hátt í 1.300 listamenn frá Íslandi og erlendis frá sem skapa einstakt tækifæri til að upplifa fjölbreytta samtímalist, tónlist, sviðslistir og skapandi verkefni fyrir alla aldurshópa.

Hátíðin er rétt að hefjast hér má kynna sér úrvalið betur. 

Björk Guðmundsdóttir og listamaðurinn James Merry opnuðu sömuleiðis sýningarnar echolalia og Ummyndlingar (e. Metamorphlings) á laugardag á Listasafni Íslands þar sem safnið er nú undirlagt af þeirra verkum. Ótal margir mættu og Halla Tómasdóttir lét sig að sjálfsögðu ekki vanta.

Lára Sóley listrænn stjórnandi hátíðarinnar er í skýjunum með helgina. 

„Opnunarhelgin gekk frábærlega og viðtökurnar fóru fram úr björtustu vonum. Tvennir uppseldir tónleikar á Mahler 8 hjá Sinfóníuhljómsveit Íslands með um 400 flytjendum í Hörpu, magnaðar opnanir í Listasafni Reykjavíkur og Listasafni Íslands og stórkostlegt að sjá Skólahljómsveitir Reykjavíkurborgar sameinast á Hörputorgi í nýju tónverki Samúels Jóns Samúelssonar um 500 ungmenni. Klúbburinn opnaði á laugardagskvöldið og komust færri að en vildu.

Við erum afar spennt fyrir áframhaldinu enda veislan rétt að byrja. Við erum líka gríðarlega þakklát fyrir þessar frábæru viðtökur og þátttöku um helgina,“ segir Lára Sóley. 

Hér má sjá vel valdar myndir frá þessum stóra og skemmtilega opnunardegi: