Elvar og fé­lagar hentu meisturum Real Madrid úr leik

Elvar Már gekk í raðir Tenerife þegar aðeins tvær umferðir voru eftir af spænsku deildinni vegna meiðsla lykilmanns í röðum liðsins. Hann hafði þá lokið tímabili sínu í Póllandi.

Markmiðið var að komast í úrslitakeppnina og Tenerife slefaði þar inn í áttunda sæti deildarinnar, neðst þeirra liða sem fór í úrslitin. Því lá fyrir risavaxið verkefni, að fella ríkjandi Spánarmeistara Real Madrid.

Tenerife vann fyrsta leikinn óvænt í Madríd en fékk svo stóran skell á heimavelli í vikunni og þótti öllum ljóst að Madrídingar myndu pakka Tenerife-mönnum aftur saman í dag, í þetta sinn á eigin heimavelli.

Það var hreint ekki svo. Úr varð jafn og spennandi leikur þar sem fátt fékk liðin aðskilin frá upphafi til enda. Tenerife var svo sterkara á lokakaflanum og vann 107-95 sigur. Liðið vann einvígið því 2-1 og bindur þar með enda á leiktíð ríkjandi Spánarmeistara sem stefndu að sautjánda Spánartitli sínum.

37 ára gamli Ástralinn Patty Mills, sem lék með San Antonio Spurs í NBA milli 2012 og 2021, stóð upp úr hjá Tenerife með 29 stig á aðeins 19 mínútum spiluðum.

Elvar Már sat allan tímann á varamannabekknum og tók ekki þátt í leik kvöldsins en gat heldur betur fylgst stoltur með liðsfélögum sínum sem fara þessu næst í undanúrslitin.