Sendir eftir­manni sínum skila­boð eftir leiki Ís­lands

Öqvist var staddur á landinu á dögunum þegar FIBA Europe þingið var haldið í Reykjavík. Heimasíða Körfuknattleikssambands Íslands tók viðtal við kappann.

Sænski þjálfarinn var með íslenska landsliðið frá 2010 til 2013 og skilaði af sér góðu búi til Craig Pedersen sem hefur síðan náð sögulegum árangri með íslenska landsliðið og skilað því inn á þrjú Evrópumót.

Alltaf gott að koma til Íslands

„Mér finnst alltaf gott að koma til Íslands vegna þess að ég á margar hlýjar og góðar minningar frá árunum sem landsliðsþjálfari,“ segir Öqvist sem í dag starfar sem framkvæmdastjóri sænska körfuknattleikssambandsins og sat áður í stjórn sambandsins í heimalandinu.

Svíinn hefur fylgst grannt með íslenska karlalandsliðinu frá því hann stýrði því sjálfur. 

Fylgist vel með íslenska landsliðinu

„Ég fylgdist að sjálfsögðu vel með landsliðinu í framhaldinu og geri enn. Ég á það til að senda Craig [Pedersen, núverandi landsliðsþjálfara] skilaboð eftir leiki. Ég naut þess sérstaklega að sjá sigurinn gegn Litháum í síðasta landsleikjaglugga í vetur,“ segir Öqvist en leikmennirnir sem komu Íslandi í úrslit í lokakeppni í fyrsta sinn í Berlín árið 2015 voru mikið til sömu leikmenn og Öqvist hafði stýrt landsliðinu.

„Því að sjá liðið ná þeim áfanga fylgdi stórkostleg tilfinning fyrir mig. Að mínu mati hafa Craig, og samstarfsfólk hans, unnið frábærlega úr því sem við fórum af stað með á sínum tíma. Hann þróaði liðið og gerði það betra,“ sagði Öqvist.

Craig Pedersen hefur nú stýrt íslenska landsliðinu í þrettán ár og alls í 112 leikjum. Liðið spilaði 26 leiki undir stjórn Öqvist.

Passar enn upp á myndskeiðið

„Það var virkilega skemmtilegt að fylgjast með liðinu í sjónvarpi á EM 2015 en það var enn skemmtilegra fyrir mig þegar Ísland var með á EM 2017 því þá hafði ég tök á því að fara til Helsinki,“ sagði Öqvist og eins og hjá fleirum í íslensku körfuboltafjölskyldunni þá var upplifunin eftirminnileg.

„Síðasti leikurinn í riðlinum á milli Finna og Íslendinga var stórkostleg stund fyrir körfuboltann á Norðurlöndunum. Höllin var stútfull og þegar finnsku stuðningsmennirnir tóku undir víkingaklappið hjá íslensku stuðningsmönnunum þá varð til einhver fegurð sem maður gleymir seint. Ég passa raunar enn upp á myndskeiðið sem ég tók í því andrúmslofti,“ sagði Öqvist en það má lesa allt viðtalið hér fyrir neðan.