Kastaði skó í mót­herja í miðjum leik

Toronto Tempo hafði betur gegn Liberty, 93-91, en þegar 1:48 var eftir af leiknum missti Jonquel Jones, miðherji Liberty, skóinn sinn. Laney-Hamilton kastaði honum og hæfði Marina Mabrey, leikmann Toronto, í bakið.

Þetta var önnur tæknivilla Laney-Hamilton í leiknum og dómarar ráku hana út úr húsi.

Chris DeMarco, þjálfari Liberty, sagði eftir leikinn að Laney-Hamilton hefði verið að reyna að kasta skónum aftur til Jones og hefði ekki ætlað að hitta Mabrey. Mabrey sagðist einnig telja að það hefði verið raunin.

„Ég þurfti aðeins að ná andanum,“ sagði Mabrey um viðbrögð sín þegar skórinn hæfði hana. „En ég held að hún hafi í raun bara verið að reyna að koma skónum aftur til JJ. En ég tek vítaskotið.“

Mabrey og Laney-Hamilton höfðu átt í útistöðum allan leikinn þar sem þær dekkuðu hvor aðra; báðar fengu tæknivillu í þriðja leikhluta fyrir deilur þeirra á milli.

Kevin Fahy dómari útskýrði brottvísun Laney-Hamilton fyrir blaðamanni á staðnum og sagði að hún hefði „tekið upp skó og kastað honum í Marinu Mabrey, og hann hæfði Marinu í bakið, svo hún fékk sína aðra tæknivillu og var í kjölfarið vikið úr körfuboltaleiknum.“

Sandy Brondello, þjálfari Toronto, sagði að hún teldi að það hefði verið óviljandi að skórinn hæfði Mabrey en það má sjá atvikið hér í fréttinni.