Pilatesæfingakerfið

"Pilates þéttir og lengir vöðva líkamans, en æfingarnar felast í að styrkja og teygja líkamann undir algjörri stjórnun, þannig að hugur fylgi hverri æfingu og fólk hvíli líkamann meðan það æfir," segir Jóhann Björgvinsson, löggiltur pilateskennari. "Ég er að kenna þessa hreinu pilates-tækni, en ég lærði hjá konu í New York sem er eini eftirlifandi kennarinn sem lærði hjá Joseph Hubertus Pilates sjálfum. Kerfið þróaði Pilates þegar hann vann í fyrri heimsstyrjöldinni við að koma sjúkum hermönnum aftur til heilsu, en hann helgaði líf sitt þessu kerfi þar til hann lést 87 ára að aldri. Ég er með tvenns konar æfingar, annars vegar einkatíma þar sem er kennt í sérhönnuðum tækjum og hins vegar hóptíma þar sem er kennt á dýnum. Í hóptímunum eru aldrei fleiri en tíu nemendur og mikið aðhald. Æfingarnar krefjast mikillar einbeitingar og ég er alltaf að laga fólk til á dýnunum því aðalatriðið er að gera æfingarnar rétt, vernda bakið og stuðla að réttri líkamsstöðu. Þetta er fullkomið æfingakerfi og læknar eru farnir að viðurkenna það sem bestu þjálfun sem hægt er að hugsa sér. Í Bandaríkjunum er þetta meira að segja orðið skyldugrein í skólum," segir Jóhann. Námskeið Jóhanns í pilates eru hafin, en kennt er í Sundlaug Seltjarnarness.