Rauð blikkljós í bíla þyrlusveitar

Starfsmenn í þyrluáhöfnum Landhelgisgæslunnar hafa fengið rauð ljós í bíla sína til að auðvelda þeim að komast leiðar sinnar í umferðinni.  Þegar þyrluáhafnir eru kallaðar út, þurfa áhafnarmeðlimir að hraða sér út á flugvöll án þess þó að brjóta umferðarreglur. Ljóst er að oftast liggur líf við þegar óskað er eftir þyrlu Landhelgisgæslunnar. Það getur því verið bagalegt þegar áhafnarmeðlimir lenda í umferðarteppu á leið til flugvallarins. Til þess að ráða bót á þessu ákvað dómsmálaráðuneytið í samráði við Landhelgisgæsluna og lögregluyfirvöld að útvega þyrluáhöfninni þessi rauðu blikkljós.  Ljósin sem þyrluáhafnirnar hafa fengið eru ekki eiginleg forgangsljós.  Þau þjóna þeim tilgangi að auka öryggi og óska eftir tillitsemi annarra ökumanna.  Einnig er þá auðveldara fyrir lögregluna að koma auga á þyrlustarfsmenn til að aðstoða þá við að komast leiðar sinnar í neyðartilfellum. Þeir starfsmenn þyrluáhafna sem prófað hafa ljósin segja að þau hafi breytt miklu.  Aðrir ökumenn hafi sýnt þeim meiri tillitsemi og vikið fyrir þeim.