Stakk mann fjórum sinnum

Tveir menn, nítján og tuttugu ára, hafa verið ákærðir, annar fyrir sérstaklega hættulega líkamsárás, fyrir framan Broadway í Ármúla í september í fyrra. Annar mannanna stakk þolandann fjórum sinnum með hnífi víðs vegar um líkamann. Aðalmeðferð í málinu var í Héraðsdómi Reykjavíkur í gær. Mennirnir tveir voru í bíl fyrir utan skólaball og rákust þeir utan í annan mann á bílaplaninu. Upp hófust átök við manninn og sá eldri tók upp hníf og stakk hann fjórum sinnum í líkamann svo af hlutust fjögur tveggja til átta sentímetra djúp sár. Eitt sáranna var í brjóstkassann, eitt á öxl og tvö á baki. Yngri árásarmaðurinn kýldi þolandanna hnefahögg í andlitið í sömu átökum þannig að af hlaust mar á vinstra auga. Mennirnir hafa báðir játað árásina. Maðurinn sem varð fyrir árásinni krefst þess að sá sem stakk hann, með hnífnum, greiði honum rúma hálfa milljón króna í skaðabætur.