Tveir í 30 daga fangelsi

Tveir Eþíópíumenn voru í gær dæmdir í 30 daga fangelsi hvor um sig í Héraðsdómi Reykjaness. Þriðji maðurinn, sænskur ríkisborgari af eþíópískum uppruna, var úrskurðaður í gæsluvarðhald fram á miðvikudag í næstu viku. Þremenningarnir voru handteknir þegar þeir reyndu að fara um borð í flugvél til Bandaríkjanna og í ljós kom að þeir tveir sem voru dæmdir í gær voru með vegabréf annarra. Maðurinn sem úrskurðaður var í gæsluvarðhald hafði séð þeim fyrir vegabréfum og áður farið með mann til Bandaríkjanna. Vonast er til að rannsókn á máli hans ljúki fyrir helgi svo hægt verði að gefa út ákæru á hendur honum.