Offita getur falið krabbamein

Ný rannsókn gefur til kynna að líkamsþyngd getur haft áhrif á nákvæmni prófa sem notuð eru til að greina krabbamein í blöðruhálskirtli. Rannsóknin leiddi í ljós að því feitari sem mennirnir voru, því lægra var magnið af tilteknum mótefnisvaka sem mældur er til að komast að raun um hvort krabbamein sé að finna í blöðruhálskirtlinum. Ef mótefnisvakinn mælist mjög lágur bendir það til þess að ekki sé um krabbamein að ræða. Menn sem eru of feitir eru með um 30% minna magn af mótefnisvakanum en menn sem eru við eðlilega líkamsþyngd. Hins vegar hafa læknar ekki alveg getað treyst á mælingar á mótefnisvakanum þar sem krabbamein er ekki ætíð til staðar þótt magnið sé hátt. Nýleg rannsókn hefur jafnvel sýnt að karlmenn með eðlilegt magn af mótefnisvakanum hafi í 15% tilfella verið með blöðruhálskrabbamein. Engin útskýring virðist vera á því af hverju of þungir karlmenn mælist með minna magn af mótefnisvakanum. Hins vegar telja læknar að of þungir menn framleiði estrógen, sem dregur úr testesteronmagni en það getur haft áhrif á mælingarnar.