Finnst best að vera í eldhúsinu

Margrét Dóróthea Sigfúsdóttir, skólastýra og þáttastjórnandi, lætur sig dreyma um stórt eldhús. Hún nýtur þess að elda góðan mat og slappa af. "Eldhúsið mitt er voða skemmtilegt og finnst mér æðislegt bæði að elda þar og vesenast. Ég er mikið fyrir að elda, og náttúrlega hefur það verið stór hluti af mínu starfi í mörg ár," segir Margrét Dóróthea Sigfúsdóttir, skólastýra Hússtjórnarskóla Reykjavíkur, en hún hefur að undanförnu birst áhorfendum Skjás eins í þáttunum Allt í drasli. "Verst þykir mér hvað eldhúsið er lítið, það er alltof lítið en ég ólst upp í stóru eldhúsi og læt mig dreyma um eitt slíkt, en það er ekkert verra að láta sig dreyma, " segir Margrét sem búið hefur við þetta eldhús í ein átta ár. "Eldhúsin í þessum gömlu húsum eru oft svo ferlega lítil," segir Margrét. Eldhúsið er þó ekki minna en svo að hún kom fyrir einum stórum ísskáp. "Ég er mjög ánægð með ísskápinn minn, þetta er stór tvöfaldur amerískur ísskápur með klakavél. Ég bara reif einn skáp til að koma honum fyrir," segir Margrét og hlær. Eldhúsið segir hún algerlega vera sinn stað þar sem henni líði mjög vel og sinni því sem henni finnst skemmtilegast að gera. "Elda, elda , elda, það er uppáhaldið mitt," segir Margrét og skellir upp úr. "En ég geri svo sem eitt og annað þarna, en ég slappa líka af í eldhúsinu og sit þar stundum og sauma út," segir Margrét. Hún segist ekki vera með neinar sérstakar reglur í eldhúsinu en hún telur mikilvægast að þar sé hægt að vinna. "Eldhús er til að vinna í og elda góðan mat, ef það er of fínt til þess þá má bara alveg sleppa því," segir Margrét sposk á svip og bætir við að lokum að auðvitað skipti máli að það sé þrifalegt. "Það má aldrei vera óvaskað upp í eldhúsinu, það er óþolandi," segir Margrét.