Hjólhýsum enn ekki óhætt

Enn er nokkuð hvasst undir Hafnarfjalli þótt nokkuð hafi lægt frá því fyrr í dag. Þá mældust hviður allt upp í 43 metra á sekúndu en sterkustu hviður nú hafa mælst um 28 metrar á sekúndu. Lögreglan í Borgarnesi segir fólki með hjólhýsi í eftirdragi og á húsbílum enn ekki óhætt að aka undir fjallinu og biður það að halda kyrru fyrir þar til veðrið gengur niður. Fyrr í dag fuku þrjú hjólhýsi út af veginum undir Hafnarfjalli. Engin slys urðu á fólki en eitt hjólhýsanna splundraðist þegar það slitnaði aftan úr bílnum sem dró það. Annars hefur umferð um svæðið gengið vel að sögn lögreglu og hefur verið mikill straumur bíla á leið til borgarinnar.