Árásarmaður af skemmtistað gaf sig fram

Maðurinn sem réðst á annan mann og skar hann illa á háls á skemmtistað við Smiðjustíg í miðborginni í nótt gaf sig fram við lögreglu um hádegisbil í dag. Maðurinn braut glas og lagði til fórnalambsins sem fékk stóran skurð á háls auk nokkurra áverka annars staðar á líkamanum þar sem hann reyndi að verja sig.

Maðurinn var fluttur með sjúkrabíl á slysadeild og voru saumuð tuttugu spor í hálsinn á honum en hann mun þó ekki vera í lífshættu. Vitni greindu frá því hver árásarmaðurinn var og leitaði lögregla hans fram eftir morgni, eða þar til hann gaf sig sjálfur fram. Að sögn lögreglu hefur hann verið afar samvinnuþýður og telst málið að mestu upplýst en búist er við að fórnarlambið leggi fram kæru á hendur honum.