Tilkynning um vopnað rán byggð á misskilningi

Svo virðist sem tilkynning til lögreglunnar um vopnað rán í Nettó í Mjóddinni hafi verið á misskilningi byggð. Þegar lögregla kom á vettvang kom í ljós að starfsmaður verslunarinnar hafði grunað mann um búðarhnupl og hljóp á eftir honum. Í öllum hamagangnum hringdi hann í lögreglu og tilkynnti vopnað rán. Búðarþjófurinn meinti var á bak og burt þegar lögregla kom á vettvang og mun hún ekkert aðhafast frekar í málinu þar sem það er metið lítilvægt.