LÍÚ býst við betri tíð

Friðrik Jón Arngrímsson, framkvæmdastjóri LÍÚ, gerir ráð fyrir að verðmæti útfluttra sjávarafurða muni aukast um fimmtán til tuttugu prósent á árinu 2006 miðað við árið á undan.

Hagstofan birti nýlega tölur sem sýndu að á árinu 2005 voru fluttar út sjávarafurðir að verðmæti 110,1 milljarður króna. Útflutningur dróst saman milli ára, í tonnum um 8,8 prósent en í verðmæti um 9,5 prósent.

Þrennt hefur úrslitaáhrif á afkomu sjávarútvegsins: aflamagnið, afurðaverð erlendis og gengi krónunnar. Friðrik segir að samdráttinn í verðmæti útfluttra sjávarafurða megi fyrst og fremst rekja til hás gengis íslensku krónunnar. Það hefði getað haft afdrifaríkar afleiðingar fyrir sjávarútveginn, hefði gengið ekki tekið að veikjast að nýju.