Ísraelar hunsuðu viðvaranir

Ísraelskir hermenn höfðu að engu ítrekaðar óskir Sameinuðu þjóðanna á þriðjudag um að hætta árásum á bækistöð friðargæslumanna í Líbanon, samkvæmt frásögn Sameinuðu þjóðanna. Fjórir þeirra létust þegar ísraelsk sprengja skall á bækistöðinni.

Ehud Olmert, forsætisráðherra Ísraels, lýsti í gær yfir „djúpri eftirsjá“ vegna atviksins, þess að ísraelskir hermenn urðu að bana fjórum mönnum úr friðargæslusveitum Sameinuðu þjóðanna í Líbanon á þriðjudag. Jafnframt sagðist hann ætla að sjá til þess að ísraelski herinn léti fara fram ítarlega rannsókn á atvikinu.

Í yfirlýsingunni sinni sagðist Olmert þó hafa efasemdir um þá fullyrðingu Kofis Annan, framkvæmdastjóra Sameinuðu þjóðanna, að ísraelsku hermennirnir hefðu vísvitandi gert árás á liðsmenn Sameinuðu þjóðanna.

Starfsmenn Sameinuðu þjóðanna, bæði í Líbanon og New York, höfðu samt hvað eftir annað haft samband við Ísraela til að mótmæla árásum ísraelska hersins á bækistöðina, sem er skammt frá bænum Khiyam í suðurhluta Líbanons.

Á tímabilinu frá klukkan 13.20 til 19.17 á þriðjudaginn beindu ísraelskir hermenn sprengjum sínum í 21 skipti að bækistöðinni. Fjórum sinnum hittu þeir í mark, tólf sinnum lentu skotin í innan við hundrað metra fjarlægð, en fimm skotanna lentu fjær en það.

Friðargæslusveitir Sameinuðu þjóðanna hafa lengi haft bækistöð þarna og hún var rækilega merkt sem slík.

Sameinuðu þjóðirnar hafa verið með friðargæslusveitir í Líbanon allt frá árinu 1978, en þá höfðu Ísraelar gert nýlega innrás í landið. Á ráðstefnu um Líbanon, sem haldin var í Róm í gær, samþykktu fulltrúar Sameinuðu þjóðanna, Bandaríkjanna, Evrópusambandsins, Líbanons og fleiri ríkja og alþjóðastofnana að senda nýjar og öflugri friðargæslusveitir þangað og sjá jafnframt til þess að vopnahlé kæmist á sem fyrst.

Hernaður Ísraela í Líbanon hefur nú staðið yfir í rúmlega hálfan mánuð og kostað hátt í fimm hundruð manns lífið. Flestir þeirra eru almennir borgarar í Líbanon. Allt að 750 þúsund manns í Líbanon hafa flúið að heiman vegna átakanna.

Hizbollah-skæruliðar í Líbanon hafa einnig skotið nærri 1.500 flugskeytum suður yfir landamærin og orðið 18 almennum borgurum að bana.