Brjálaður út í William Gallas

Jose Mourinho, stjóri Chelsea, er alls ekki sáttur við framkomu Frakkans William Gallas sem mætti ekki til London fyrir för liðsins til Bandaríkjanna. Treyjunúmer Gallas hefur verið tekið af honum og gefið Michael Ballack en sá franski var löngum orðinn ósáttur með að þurfa að fylla upp í vinstri bakvarðarstöðuna síðasta tímabil.

"Það er ekki bara ég sem er í uppnámi, við erum það allir. Það er af því við höfðum sterka fjölskyldu og samheldan hóp sem hefur verið sýnd vanvirðing og ég er alls ekki hrifinn af því," sagði Mourinho en umboðsmaður Gallas sagði að um misskilning væri að ræða.

Chelsea vill alls ekki missa Gallas en hann hefur verið orðaður við AC Milan. Hann snýr líklega aftur til London í dag en gæti verið settur beint út í kuldann af Englandsmeisturunum.