Kominn til Ferrari?

Finnski ökuþórinn Kimi Raikkonen hefur skrifað undir fimm ára samning við Ferrari samkvæmt Ilta-Sanomat í Finnlandi. Dagblaðið hefur þetta eftir mjög öruggum heimildum og segja að Raikkonen fái 32 milljónir Evra á hverju ári fyrir samninginn. Michael Schumacher hefur enn ekki tekið ákvörðun um hvort hann hætti eða haldi áfram en hann mun tilkynna það eftir mánuð, þegar keppt verður á Monza, heimavelli Ferrari.

Ferrari neitaði einnig þeim fregnum í gær að Ross Brawn ætlaði sér að taka frí frá Formúlunni eftir tímabilið, eins og þýskir fjölmiðlar héldu fram í vikunni.