Inter hefur keypt Zlatan

Sænski landsliðsmaðurinn Zlatan Ibrahimovic var í gær seldur frá Juventus og til Ítalíumeistara Inter. Didier Deschamps, nýr þjálfari Juventus, segir Zlatan vera síðasta leikmanninn sem félagið selji eftir Ítalíuskandalinn stóra. Inter borgar 17,7 milljónir punda fyrir þennan hávaxna sóknarmann. Ibrahimovic skoraði 23 mörk í sjötíu leikjum fyrir Juventus.

Þessi kaup Inter þykja renna stoðum undir þær sögusagnir að Adriano eða Obafemi Martins séu á leið frá félaginu. Ibrahimovic er sjötta stóra nafnið sem hverfur úr röðum Juventus eftir Ítalíuskandalinn umtalaða en hinir eru Fabio Cannavaro, Emerson, Gianluca Zambrotta, Lilian Thuram og Patrick Vieira. Sá síðastnefndi fór einnig til Inter en hinir til Spánar.