Óbreyttir stýrivextir

Evrópski seðlabankinn ákvað að loknum vaxtaákvörðunarfundi sínum í gær að halda stýrivöxtum á evrusvæðinu óbreyttum en þeir standa nú í þremur prósentum. Greiningaraðilar telja líkur á að bankinn hækki vextina í október.

Almennt var búist við þessari niðurstöðu en verðbólga dróst saman um 0,1 prósent á evrusvæðinu í ágúst og er nú 2,3 prósent á ársgrundvelli.

Í Morgunkorni Glitnis í gær kemur fram að evrópski seðlabankinn hafi hækkað stýrivexti fjórum sinnum á síðustu átta mánuðum til að halda verðbólgu í skefjum.

Verðbréfamiðlarar sögðu rólegt á hlutabréfamarkaði í gær enda ættu menn ekki von á því að seðlabankinn kæmi á óvart. Helstu hlutabréfavísitölur lækkuðu lítillega á meðan beðið var eftir tilkynningu seðlabankastjóra.

Í Morgunkorninu segir að verðbólga á evrusvæðinu hafi verið yfir tveggja prósenta verðbólgumarkmiði Seðlabanka Evrópu frá því í febrúar í fyrra. Sérfræðingar telja hagvöxt á evrusvæðinu hafa náð toppi á öðrum ársfjórðungi og að helstu hagvísar bendi nú til hægari hagvaxtar það sem af er ári, að því er segir í Morgunkorninu.