Árangurstengd laun á undanhaldi hér

Á tímabilinu milli áranna 2003 og 2006 hefur dregið úr því að laun séu tengd frammistöðu í starfi. Er það í takt við þróunina í nágrannaríkjum okkar og kemur meðal annars til af neikvæðri umræðu í þjóðfélaginu um slíka umbun.

Þetta kom fram í máli Finns Oddssonar, lektors við HR og eins höfundar rannsóknar á stöðu mannauðsstjórnunar á Íslandi, sem kynnt var í Háskólanum í Reykjavík í gær. Auk Finns unnu og kynntu rannsóknina þær Ásta Bjarnadóttir lektor og Arney Einarsdóttir, sérfræðingur hjá HR. 319 fyrirtæki og stofnanir sem hafa að lágmarki sjötíu starfsmenn tóku þátt í rannsókninni á árunum 2003 til 2006. Meðal annarra niðurstaðna skýrslunnar var að einungis sextíu prósent stjórnenda taka markvisst á því þegar starfsfólk nær ekki þeim árangri sem til er ætlast af því. Er því meðal annars um að kenna að meiri hluti íslenskra fyrirtækja metur ekki frammistöðu starfsfólks eða stjórnenda með beinum hætti.

Rannsóknin sýnir líka að að mörgu leyti hafi jákvæð þróun átt sér stað að undanförnu á Íslandi og meiri þungi lagður í mannauðsmál en áður. Svo virðist sem opinberi geirinn sé skemmra á veg kominn en einkageirinn að mörgu leyti. Til að mynda er einungis í 44 prósentum tilvika til staðar skilgreind starfsmannadeild í skipuritum opinberra fyrirtækja samanborið við 71 til 74 prósent í öðrum geirum.