Enn lýst eftir árásarmanni

Lögreglan í Reykjavík lýsir eftir hugsanlegum vitnum að því þegar ráðist var á unga stúlku á Sogavegi á föstudagskvöld. Maðurinn var á rauðum, eða dökkrauðum fólksbíl, sem líkist Subarau Impresa, en gæti þó verið stærri bíll. Bíllinn var með svo kallaðan spoiler. Maðurinn sem réðist á stúlkuna er ungur, á bilinu sautján til nítján ára. Hann er um það bil einn sjötíu og fimm á hæð, skolhærður með axlarsítt hár að aftan og sítt í hliðum. Maðurinn réðst að stúlkunni og reyndi að draga hana inn í bílinn og hafa á brott með sér. Stúlkunni tókst að slíta sig frá honum skammt frá bílnum sem lýst var og fór maðurinn þá í burt á bílnum. Þeir sem hugsanlega geta veitt upplýsingar vegna þessa máls eru beðnir um að hafa samband við lögregluna í Reykjavík.