Harður árekstur á Húsavík

Harður árekstur á gatnamótum við hafnarsvæðið á Húsavík í dag þar sem ungur maður á svokölluðu mótorkrosshjóli ók framan á pallbíl. Að sögn lögreglunnar á Húsavík virðist sem ökumanni bifhjólsins hafi fipast á gatnamótunum og hann farið yfir á rangan vegarhelming, en hann ók að sögn lögreglu yfir hámarkshraða á svæðinu. Hann var fluttur með sjúkrabíl á Fjórðungssjúkrahúsið á Akureyri þar sem hann gengst nú undir rannsókn en ekki fást upplýsingar um það að svo stöddu hvort hann sé í lífshættu. Ökumann pallbílsins sakaði ekki í árekstrinum en bæði bifhjól og bíll eru nokkuð skemmd.