Hlutabréf lækkuðu í Evrópu

Gengi hlutabréfa lækkaði talsvert á mörkuðum í Evrópu í dag í kjölfar ótta fjárfesta við að evrópski seðlabankinn muni hækka stýrivexti á næstunni til að koma í veg fyrir aukna verðbólgu í aðildarríkjum Evrópusambandsins (ESB). Hagvöxtur mældist 0,6 prósent á fyrsta ársfjórðungi innan aðildarríkja ESB og er búist við prósenta aukningu út árið. Samfelldur hagvöxtur sem þessi hefur ekki mælst innan ESB síðan um mitt ár 2000.

Bresku námafyrirtækin Anglo American og Antofagasta, sem bæði eru skráð í kauphöll Lundúna í Bretlandi, hafa fram til þessa lækkað mest eða um 3 prósent.

Þá lækkaði DJ Stoxx hlutabréfavísitalan um 1,8 prósent og stendur hún í 472 stigum. Vísitalan náði methæðum 11. maí síðastliðinn en þá fór hún í 563 stig.

Ennfremur lækkaði FTSEurofirst 300 vísitalan um 0,4 prósent í dag. Hún lækkaði um 5 prósent um miðjan maí og var um að ræða mestu lækkun vísitölunnar síðan í janúar árið 2003 þegar fjárfestar losuðu sig við hlutabréf af ótta við verðbólguhækkanir, hækkanir stýrivaxta og hægingu á efnahagslífinu. Síðan þá hefur hún lækkað um 11 prósent og nemur hækkun hennar á ársgrundvelli einungis 2 prósentum.