Stjórnarskrá ESB bíður til 2008

Leiðtogar Evrópusambandsríkjanna samþykktu í Brussel í Belgíu í morgun að styðja áætlun um að ríki og alþjóðlegar stofnanir tryggi Palestínumönnum fjárstuðning, en sniðgangi um leið heimastjórn Hamas-liða. Leiðtogarnir hafa einnig gefið sér frest til ársins 2008 til að taka ákörðun um framtíð stjórnarskrár sambandsins.

Leiðtogarfundur Evrópusambandsins hófst í gær og lýkur í dag. Meðal helstu umræðuefna er ástandið meðal Palestínumanna og stjórnarskrá sambandsins. Frakkar og Hollendingar höfnuðu henní fyrra. Áætlað er að skýrsla verði unnin um stöðu stjórnarskrármálsins á næsta ári. Sambandsríkin gefa sér síðan frest til ársins 2008 til að ákveða næsta skref í málinu.

Með þessari ákvörðun má segja að leiðtogarnir hafi viðurkennt að umþóttunartími þeirra síðasta árið hafi engu skilað og ekkert áorkast í að finna lausn á deilum ríkjanna um stjórnarskránna og innihald hennar. 15 ríki af 25 hafa þó staðfest hana.

Heimastjórn Palestínumanna var einnig til umræðu á fundinum. Leiðtogar Evrópusambandsins hafa ákveðið að styðja við áætlun sem miðar að því að tryggja Palestínumönnum fjárhagsaðstoð. Heimastjórn Hamas-liða verður þó sniðgengi þar sem liðesmenn samtakanna hafa ekki viljað hafna ofbeldisverkum eða viðurkenna Ísrael.

Talsmaður sambandsins sagði stutt í að þau ríki og bandalög sem standi að kvartettnum svokallaða, það er Bandaríkin, Rússland og Sameinuðu þjóðirnar, samþykki áætlunina. Lokað var fyrir fjárstuðning þegar Hamas-samtökin komust til valda eftir kosningar í janúar. Palestínumenn hafa átt í erfiðleikum vegna fjárskorts. Sjúkarhús hafa átt erfitt með að halda rekstri áfram og fjölskyldur hafa neyðst til að selja verðmæti sín til að eiga fyrir mat. Fjölmörg ríki í Mið-Austurlöndum hafa heitið heimastjórninni fjárstuðningi síðan greiðslur til hennar voru frystar.