Ísraelsher réðist inn á Gaza

Ísraelsher réðist inn í suðurhluta Gaza-svæðisins í gærkvöldi til að reyna að frelsa ísraelskan hermann sem hefur verið í gíslingu herskárra Palestínumanna frá því á sunnudag. Abbas, forseti Palestínu, segir innrásina stríðsglæp.

Árás Ísraelshers er gerð innan við sólahring eftir að tilkynnt var um samkomulag milli Hamas-liða, sem leiða heimastjórn Palestínumanna, og Fatah-hreyfingar Mahmouds Abbas, forseta. Samkvæmt samkomulaginu fær Abbas meðal annars umboð til friðarviðræðna við Ísraelsmenn. Ísraelsmenn gefa lítið fyrir samkomulagið.

Það var svo seint í gær sem Ísraelsmenn vörpuðu sprengjum á þrjár brýr og raforkuver á suðurhluta Gaza-svæðisins. Við það fór rafmagn af stórum hluta þess landsvæðis. Þá var skriðdrekum ekið yfir landamærin og þeim fylgdu landgönguliðar. Takmarkið er aðeins eitt, að frelsa nítján ára gamlan hermann sem herskáir Palestínumenn tóku höndum á sunnudaginn.

Talsmaður hersins segir að aðgerðum verði hætt og herliði snúið heim þegar honum verði skilað heilu og höldnu. Samkvæmt vefsíðu ísraelska blaðsins Haaretz er það ætlun hermanna að umkringja mannræningjana og koma í veg fyrir að hermanninum verði smyglað til Egyptalands og þaðan til Súdan.

Þeir sem hafa hermanninn unga í haldi hafa heitið upplýsingum um dvalarstað hans ef palestínskar konur og börn, sem eru í haldi Ísraelsmanna, verði látin laus úr fangelsum. Því hafa ísraelsk stjórnvöld hafnað.

Að sögn Ísraelshers mættu hermenn engri andspyrnu og íbúar á svæðinu munu hafa leitað skjóls í Rafah.

Abbas, forseti Palestínumanna, sagði í morgun að innrás Ísarelshers á Gaza-ströndina í morgun væri glæpur gegn mannkyninu. Talsmaður Hamas segir hana stríðsglæp. Verið sé að refsa öllum Palestínumönnum fyrir glæpi nokkurra þeirra. Einn þingmaður Hamas lét hafa eftir sér að Olmert, forsætisráðherra Ísraels, væri að stefna lífi hermannsins unga í hættu með aðgerðunum.