Ég misnota ekki lyf

Bandaríski hjólreiðakappinn Floyd Landis sem féll á lyfjaprófi eftir Frakklandshjólreiðarnar á dögunum, segist alsaklaus. Hann segist alls ekki misnota nein lyf og segir hátt testósterónsmagn í líkama sínum vera eðlilegt.

"Ég vil ekki vera dæmdur og grafinn fyrirfram," sagði Landis í yfirlýsingu frá Madrid í dag. "Ég vil að seinna sýnið sem tekið var úr mér verði rannsakað og gert opinbert og ég er tilbúinn til að fara í rannsóknir sem sýna fram á það að líkami minn framleiðir óeðlilega mikið af hormónum," sagði Landis og bætti við að sér dytti aldrei í hug að misnota lyf - hann væri íþróttamaður sem helgaði sig íþrótt sinni og æfði af krafti til að ná jafn langt og raun bæri vitni.