Gekk of langt segir yfirlögregluþjónn

Arna Scram, formaður Blaðamannafélags Íslands, segir að félaginu hafi ekki borist neinar kvartanir vegna samstuðs myndatökumanns og lögreglu á Egilsstöðum í gær.

Málið virðist hafa leysts af sjálfu sér þar sem Óskar Bjartmarz yfirlögregluþjónn hafi beðist afsökunar á að hafa stjakað við myndatökumanni Ríkisútvarpsins fyrir utan lögreglustöðina á Egilsstöðum. Óskar sagðist í samtali við Rúv hafa gengið of langt og Arna segir ekki hægt að sjá annað á myndunum en að hann hafi gert það. Það sé ekki lögreglunnar að ritskoða, fjölmiðlarnir sjálfir ákveði hvenær og hvort myndað sé á vettvangi og beri ábyrgð á því. Oft hafi slegið í brýnu milli lögreglu og fjölmiðla og það sé miður, en þetta mál virðist hafa leyst af sjálfu sér.