Ljósmyndir í Skotinu

Fimmtudaginn 3. ágúst opnði Hildur Margrétardóttir, myndlistarmaður, sýningu á ljósmyndum í Skotinu, Ljósmyndasafni Reykjavíkur, Grófarhúsi, Tryggvagötu 15, 6. hæð. Myndröðinni er varpað úr skjávarpa á vegg og mynda þær lifandi flæði og frásögn.

Hildur Margrétardóttir er myndlistarmaður sem vinnur iðulega með ljósmyndir og hefur í þeim kosið hófstemmda aðferð til að segja frá athöfnum sem við fyrstu sýn virðast hversdagslegar og kunnuglegar. Hún segir vinnuaðferð sína byggjast á löngun til að segja frá, gerast sögumaður um atburði sem hún hefur orðið vitni að. Með þessum frásagnarhætti vill Hildur sýna fram á fagurfræði hins daglega lífs, sem við hugsanlega tökum ekki eftir í amstri daganna, ef til vill vegna þess að sú fagurfræði er okkur svo gjörkunnug að við gleymum að horfa á hana og hættum þar af leiðandi að skynja hana. Horfum án þess að sjá.

Í kringum okkur eiga sér sífellt stað atburðir sem eru í sjálfu sér stórkostlegir og á stundum nánast guðdómlegir, án þess að við beinum athygli okkar að þeim. Þannig gætum við misst af atvikum sem hafa afl til að veita okkur innblástur og endurnýjun í hversdagsleikanum, geta fyllt okkur nýrri tegund af fagurfræði.

Hildur ljósmyndar iðulega rými innan heimilis eða fólk við daglega iðju sína og leitast í myndunum við að fanga augnablik þar sem viðvera manneskjunnar er sterk þrátt fyrir að hún sé stundum ekki innan ramma myndarinnar eða vart greinanleg. Með því opnast túlkunarmöguleikar um tilgang myndarinnar, en einnig gefst tækifæri til að einbeita sjón sinni að rýminu og hlutum innan þess og velta fyrir sér hvaða athafnir hafi átt sér stað eða eiga eftir að eiga sér stað. Reynsluheimur áhorfandans fær að njóta sína við að fylla upp í frásögn myndarinnar og hann fær frelsi til túlkunar eftir eigin höfði og hugarástandi.

Skotið er nýr sýningakostur hjá Ljósmyndasafni Reykjavíkur. Markmiðið með þessari nýjung er að kynna hina margvíslegu þætti ljósmyndunar, jafnt landslagsljósmyndun, portrettljósmyndun, blaðaljósmyndun eða ljósmyndun sem myndlist. Tilgangurinn er einnig að bjóða upp á aukið sýningarrými og gefa fleiri ljósmyndurum og listamönnum sem vinna með ljósmyndamiðilinn kost á að koma verkum sínum á framfæri. Ljósmyndunum er varpað úr skjávarpa á 150 x 190 cm stóran vegg og mynda flæði ljósmynda.