Besta afkoma í sögu SPH

Sparisjóður Hafnarfjarðar (SPH) skilaði 311 milljóna króna hagnaði á fyrstu sex mánuðum ársins. Þetta er 69,6 prósenta aukning miðað við sama tímabil í fyrra.

Í tilkynningu frá SPH til Kauphallar Íslands kemur fram að hagnaður fyrir skatta hafi numið 370 milljónum króna en það er 156 milljónum krónum meira en á sama tíma í fyrra.

Tekjur af hlutabréfum og öðrum eignarhlutum voru 268 milljónir króna en voru 115 milljónir á sama tímabili 2005 og hækkuðu um 132,5 prósent á milli ára. Þá hækkuðu þjónustutekjur úr 195 milljónum króna í 358 milljónir króna eða um 84,1 prósent, að því er fram kemur í tilkynningunni. Gengishagnaður af innlendum og erlendum veltuverðbréfum nam 90 milljónum króna samanborið við 162 milljónir króna á sama tímabili á síðasta ári.

Laun og launatengd gjöld námu 431 milljónum króna á tímabilinu en voru 444 milljónir króna á sama tímabili 2005, drógust þau saman um 3 prósent á milli tímabila.

Þá nam afskriftareikningur útlána 549 milljónum króna í lok júní en það svarar til 1,3 prósenta af útlánum og veittum ábyrgðum en hlutfallið um síðustu áramót var 1,6 prósent. Framlag í afskriftareikning útlána endurspeglar ekki endilega töpuð útlán, heldur er um að ræða fjárhæð sem lögð er til hliðar til að mæta hugsanlegum útlánatöpum, að því er segir í tilkynningunni.

Heildareignir SPH í lok júní námu tæpum 53,8 milljörðum króna og hafa þær aukist um rúman fimmtung frá áramótum.

Útlán SPH námu 39,4 milljörðum króna á tímabilinu og er það aukning um 19 prósent frá áramótum.

Þá nam eigið fé SPH 4,1 milljarði króna í júnílok og hefur það vaxið um 324 milljónir króna frá áramótum eða um 8,1 prósent. Eiginfjárhlutfall SPH nam 11,3 prósentum í lok tímabilsins en það var 15,1 prósent um síðustu áramót.

Í tilkynningunni segir ennfremur að rekstrarniðurstaðan á fyrstu sex mánuðum ársins hafi verið ein sú besta á fyrri helmingi árs í rúmlega 103 ára sögu SPH og geri stjórnendur sjóðsins ráð fyrir góðri afkomu hans á árinu í heild.