Hvatt til óhæfuverka gegn Bandaríkjamönnum

Næstráðandi hjá al Kaída hryðjuverkasamtökunum hvetur til óhæfuverka gegn Bandaríkjamönnum og bandarískum hagsmunum í nýju myndbandi sem birt var í dag. Upptaka af leiðtoga samtakanna, Osama bin Laden, sem sögð er tekin skömmu fyrir hryðjuverkárásirnar ellefta september 2001 var einnig birt í dag.

Myndbandið er níutíu og tveggja mínútna langt og ber titilinn "Árásirnar á Manhattan". Þar má sjá myndir af bin Laden þar sem henn er að hvetja ódæðismennina áfram og segja þeim að búa sig undir píslarvættisdauða, nokkrum dögum áður en þeir létu til skarar skríða fyrir fimm árum. Einnig má sjá upptökur þar sem nokkrir árásarmennirnir kveðja ættingja og vini. Einnig má sjá þá við æfingar á ótilgreindum stöðum. Líklegast er þó talið að upptakan sé gerð í Afganistan.

Á myndbandinu má einnig sjá bin Laden funda með helstu bandamönnum sínum, þeim Mohammed Atef og Ramzi Binalshibh. Atef féll í loftárásum Bandaríkjamanna í Afganistan 2001 og Binalshib var tekinn höndum fyrir fjórum árum í Pakistan og er nú í haldi Bandaríkjamanna. Myndbandið er merkt As-Sahab sem er eins konar upplýsingaveita al Kaída.

Ayman al-Zawahri, næstráðandi hjá al Kaída samtökunum, kemur fram í nýju myndbandi sem var birt var á vefsíðu öfgasinnaðra múslima í dag. Þar hvetur hann til þess að múslimar herði á árásum sínum gegn Bandaríkjamönnum. Þar segir hann frekari ógnaratburða að vænta.

Bæði bandaríska fréttastöðin CNN og arabíska stöðin Al Jazeera hafa sýnt brot úr myndbandinu í dag þar sem sjá má al-Zawahri íklæddan hvítum kufli þar sem hann situr fyrir framan bókaskáp. Hann segir meðal annars stjórnvöld í Egyptalandi, Jórdaníu og Sádí-Arabíu bera ábyrgð á drápum á múslimum í Mið-Austurlöndum.